كل ما تود ان تعرفة حول عملة البت كوين (BitCoin)

بسم الله الرحمن الرحيم

بداية الموضوع

النهارده هنتكلم عن الـ bitcoin .. مين الـ بِت كُويِن دي ؟ وإيه حكايتها ! تابع معانا علشان تعرف 

قبل ما نبدأ أحب أقول لك إننا هنتكلم عن عملة ألكترونية قادرة أنها تغير الأقتصاد العالمي ..
سعر البِتكُويِن الواحدة دلوقتي حالاً وأنا بكتب المنشور ده 573 دولار يعني حوالي 6800 جنيه مصري
  فتابع معايا علشان تعرف إزاي الناس بيقدروا يجيبوا البِتكُوين دي ، وإزاي تقدر تجيبها أنتا كمان  

* الفقرة الأولي : ملهاش لزمه ولو إنك سريع الملل ممكن تسيبها وتتمشي لغاية ما توصل للفقرة التانية علي طول 

الـ بِتكُويِن ( Bitcoin ) دي يا سيدي عملة ألكترونية زيها زي الدولا واليورو وباقي العملات ،
وتقدر من خلالها تشتري أي منتجات من علي النت أو حتي تحولها لفلوس حقيقة
سواء دولار أو يورو أو حتي دينار كويتي 

البِتكُويِن بتختلف عن العملات الورقية العادية في إنها ملهاش أي وجود علي أرض الواقع  يعني هيا وهمية ،
ملهاش أي وجود فيزيائي .. مش ملموسه ، تعاملك بيها كلُه بيبقي علي النت بس ..
 يعني مينفعش تعمل فيها زي الفلوس وتخبيها تحت البلاطه 

البِتكُويِن قائمة علي مبدأ النِد للنِد ( Peer to peer ) يعني التعامل بيها بيكون من شخص لشخص ،
 بدون تدخُل من أي وسيط زي البنوك 

البِتكُويِن كعملة فهيا سايبه علي حَل شعرها ، ملهاش حاكم ولا شاكِم  مفيش بنك متحكم فيها ،
 أي حد عنده كمبيوتر بمواصفات عالية يقدر يحصل عليها عن طريق عملية أسمها التَعدين
هكلمك عنها بالتفصيل في الفقرة الرابعة 

 الفقرة التانيه 

 ودي مفيهاش غير رَغي مفيش منه فايده غير أنه هيطوَّل المنشور أكتر ،
ممكن تسيبها وتنتقل للفقرة التالته لو حابب 

علشان أبسَط لك فكرة عمل البِتكُويِن هستخدم معاك مثال أتشرح في مقال علي موقع Medium بعنوان
 إزاي توضَّح البِتكَوين لطفل في السابعة من عُمره  هتلاقي الرابط في التعليقات 

تخيل فيه أوضه "حُجرَه بالفُصحَي " فيها كاميرات شغاله 24 ساعه بتسجَّل أي حاجه تحصل
 وفيه في الأوضه دي خمس حصالات شفافين بحيث إنك تقدر تشوف الفلوس اللي موجود في الحصالات
 دي بكل وضوح ، وكل حصالة من دول صاحبها واقف برَّه معاه كود معين لفتح حصالته ..

وشخص من الخمسه أسمه " س " أشتري حاجه من تاجر أسمه " ص " ، فقام " س " ده إدي
 كود الحصالة بتاعته لـ " ص " علشان يدخل ياخد فلوسه ، فـ التاجر اللي أسمه " ص " دخل الأوضه
وكان مغَطي وِشُه علشان الكاميرات متظهرش وِشُه في التسجيل و نقل الفلوس من
حصالة المُشتري " س " لحصالتُه اللي موجوده في نفس الأوضه وخرج  

دلوقتي الكاميرا هتكون سجلت إنه تَم نقل مثلاً 5000 جنيه من حصالة " س " لحصالة " ص " ،
لكن محدش يعرف مين الشخص اللي نقل الفلوس ده  لأنه كان مغطي وِشُه فمش معروف مين هوا 

البِتكُويِن قائمة علي نفس الفكرة دي 

 الفقرة التالته 

الـ بِتكُويِن أتقدمت أول مره في ورقة بحثية سنة 2008 عن طريق واحد مجهول
 الهوية أسمه ( ساتوشي ناكاموتو - Satoshi Nakamoto ) الشخص ده بعد ما قدم الورقة
 البحثية دي أختفي تماماً .. محدش عارف مين هوا .. محدش يعرف هوا راجل ولا أمرأة .. شخص
حقيقي ولا مجرد أسم مستعار لكيان أو مجموعة أشخاص بيتحكموا في العملة دي .. حاجه كده
عامله زي اللهو الخفي 

لكن في مايو 2016 ظهر شخص أسمه " كريج رايت " وقال أنه هوا ساتوشي مؤسس الـ بِتكُويِن
 وقدم شوية أدله علي كلامه ده .. مش هكلمك كتير في النقطة دي لأن ميهمنيش إنك تعرف مين
 هوا " ساتوشي " ده قد ما يهمني إنك تعرف إزاي الناس بتجيب الـ بِتكُويِنز والزهر بيلعب معاهم 

الفقرة الرابعة :

 ودي بقي تختلف عن التلاته اللي فوقها بأنها ملهاش أي لزمه وممكن
 أنك تطلب Uber وتروح للفقرة الخامسة علي طول 

أصدار أو طباعة الفلوس الورق زي الجنيه اللي في جيبك دلوتي ده  بيبقي متوقف علي البنك المركزي لكل دولة ..
 يعني البنك المركزي هوا اللي بيقرر يطبع فلوس ولا لاء 

علي العكس بقي .. إستصدار البِتكُويِن دي عملية ملهاش حاكِم ولا شاكِم  أي حد يقدر أنه يطلَّع العملية دي ،
 والعملية دي بتتسمَّي بـ " التَعدين " بيقوم بيه " المُعَّدِنين " علشان يحصلوا علي البِتكُويِنز  وعملية
 التَعدين دي ممكن أي حد من أي مكان في العالم عنده كمبيوتر متوصَّل بـ أنترنت بمواصفات عالية تكفي
لتشغيل برنامج التَعدين اللي أسمه Bitcoin Miner أنه يقوم بالتَعدين ويطلَّ Bitoin والزهر يلعب معاه 

بالبرنامج ده بتقدر إنك تحِل شوية ألغاز " خوارزميات " بتاخدها من شبكة البِتكُويِن ، ولمَّا بتحِل اللغز
 ده البرنامج بيُصدر عُملة Bitcoin وبيحفظها في الملف بتاعك 

عاوز بس أقول لك إن أستصدار البِتكُويِن الواحده مش بالسهولة اللي أنتا فاكرها بتاتاً 

البِتكُويِن كـ عُملة معدنية بيتم توليدها عن طريق خوارزمية التشفير ( SHA-256 ) بصيغة سِت عشرية ،
 وكُل عُملة بِتكُويِن المستخدم بيقوم بتوليدها بتتحفظ في ملف أسمه المحفظة ( Wallet ) 

 الفقرة الخامسة

لو متعرفش حاجه عن " التضخم الأقتصادي " فدي مشكلة فظيعة قادرة إنها تسحِل أي دولة وتخليها
بتشحت التضخم ده بيحصل لمَّا بيزيد أستهلاك الشعب عن أنتاجه ، بمعني لما الناس بتشتري أكتر من ما بتنتج
، بيحصل لما بتفقد العُملة قيمتها الشرائية ، زي إن يبقي الجنيه بتاعك أو الدولار " كفي الله الشر  "
مش قادر يشتري حاجه كمان بتحصل لمَّا البنك المركزي بتاع أي دولة يطبع فلوس كتير ،
 فـ الفلوس بتتوفر بكثره فبالتالي مبيبقاش ليها قيمة ، وده اللي حصل مع تسع دول

المهم بقي .. علشان البِتكُويِن ميتعرضش لمشكلة التضخُم دي فـ القائم عليه حط حد لأنتاج البِتكُويِن
وقال إنُه مش هيتم أنتاج أكتر من 21 مليون عُمله في العالم كله .. بيقولوا إن حالياً بيتم إنتاج حوالي 25 عملة
 بِتكُويِن كل 10 دقايق في العالم كله 

إلي الآن تم إنتاج حوالي 14 مليون عملة من الـ 211 ، ومن المتوقع الوصول إلي أنتاج الـ 21 مليون
 عُملة في الفترة من سنة 2025 لسنة 2030 

بعد ما يُنتِجوا الـ 21 مليون عُملة هيبقي الطريق الوحيد للحصول علي البِتكُويِن عن طريق
شراءها من ناس معاها البِتكُويِن ، وعلشان يضمنوا عدم تضَخُم البِتكُويِن قالوا إنه هيتم تعقيد
 الخوارزميات مع زيادة عدد المُعَدنين لغاية ما يتوقف إصدارها تماما 

خطوات زي دي لمَّا يتم تنفيذها البِتكُويِن هتبقي نادرة جداً مستقبلاً ؛ لذلك اللي أخترعها خلاها قابلة
 للتقسيم إلي أجزاء أصغر أسمها " الساتوشي " يعني كل بِتكُويِنايه واحده  هيبقي فيها - حوالي - 100 مليون ساتوشيهايه 

 الفقرة السادسة 

التعامل بالبِتكُويِن بيكون حُر وبدون أي قيود وبدون تدخل من أي وسيط .. يعني تقدر إنك تشتري
 بالمبلغ اللي تحبُه وتحوَّل لأي حد من غير ما يتم خصم أي جزء من القيمة اللي حولتها  

عمليات بيع أو شراء البِتكُويِن بتكون سرية بعيد عن أي تدخل فيها ، وبعيد عن الحكومات كمان
 ، يعني هترتاح من الضرائب وخلافه 

البِتكُويِن مش مرتبطة ببلدك اللي أنتا فيها ، بالعكس دا أنتا تقدر تستخدمها علي نطاق عالمي  

* الفقرة السابعة والأخيرة : ودي فيها أسئلة مهمة ، بس مش هتقدر تجاوب عليها لو مكنتش
قرأت الفقرات الستة اللي قبل كده 

ألمانيا تعتبر أول دولة أعترفت رسمياً بالبِتكُويِن علي أنها عملة رسمية ، معني كده أنهم ممكن يحطوا ضرائب علي تعامل الشركات بالبِتكُويِن ، لكن التعاملات الفردية هتبقي معفيَّه من الضرائب 

فيه قاضي أمريكي أصدر حكم بأن البِتكُويِن عملة مُعترف بيها ونوع من أنواع الفلوس ، وممكن إن الحكومة تنظم صرفها إلي خلاف ذلك ، لكن لسه الولايات المتحدة الأمريكية ما أعترفتش بالعملة " رسمياً " 

شركة " روبوكوين " هيا أول شركة عملت صراف آلي " ATM " في مدينة " فانكوفر " في كندا
وبكده تكون كندا أول دولة أتعاملت بالبِتكُويِن 

مطعم " the pizza guys " في دبي هوا أول مطعم أضاف خيار الدفع عن طريق البِتكُويِن
بالأضافة للدفع عن طريق البطاقة الأئتمانية والفلوس 

تقدر بردو تشوف الموضوع ده 

عشر نصائح مهمة علشان موبايلك ميتسرقش